Rhy Agos i'w Werthfawrogi! - Ysgol Llandrillo

Ychydig o gaeau, ychydig o goed

Sy rhyngon ni acw a’r Berwyn erioed.

Fel haul y bore, fel dŵr, fel Mam,

Mae o yno, heb inni holi pam.

Ond dyna ddarganfod wrth fynd am dro

Nad oedden ni yn ei nabod o.

Dychryn yn arw ar ymyl y dibyn:

Gwyro ffordd arall rhag ofn inni ddisgyn.

Ac wedi’r daith fyglyd ar hyd y ffordd fach

Mor braf oedd llond sgyfaint o awyr iach.

Wydden ni ddim bod ‘na goeden a’i phen

Yn chwarae ping-pong efo sêr y nen.

Wydden ni ddim bod ‘na ffisig da iawn

Yn nail y mynydd, ym mlodau’r mawn.

Wydden ni ddim, cyn gweld y plu gwyn,

Bod eira yng nghanol yr ha’ ffor’ hyn.

Hel y dail a’r blodau di-ri

Er mwyn eu dangos nhw i chi.

Da fyddai’u gosod yn ddel ar y bwrdd,

Ond mi chwythodd y gwynt nhw i gyd i ffwrdd.

Ychydig o gaeau, ychydig o goed

Sy rhyngon ni acw a’r Berwyn erioed.

A ninnau’n meddwl, os meddwl o gwbwl,

Wrth weld y Berwyn drwy’r gwydyr dwbwl,

Ein bod ni yn ei nabod o…

Wel, mi rydan ni rwan, ar ôl mynd am dro!