LIFE ar y Maes yn yr Eisteddfod Genedlaethol

Mynychodd y Project LIFE yr Eisteddfod Genedlaethol yn Y Bala rhwng dydd Sadwrn 1 Awst a dydd Sadwrn 8 Awst 2009.  Roedd gan y project ei stondin ei hun ar y Maes a galwodd tua 1,000 o bobl heibio yn ystod yr wythnos.

Drwy ein perthynas â Chyngor Cefn Gwlad Cymru (CCGC) bu’r project yn ddigon ffodus i gymryd rhan yn y project Natur ein Bro.  Project blynyddol yw hwn gydag ysgolion lleol dalgylch yr Eisteddfod Genedlaethol (eleni roedd yr holl ysgolion o ardal Y Bala).  Ymwelodd yr ysgolion â’r Project LIFE ar lan Llyn Efyrnwy ym mis Mai a Mehefin.  Yr ysgolion oedd:

Ysgol O M Edwards

Ysgol Llandrillo

Ysgol Bro Tryweryn

Ysgol y Ffridd

Ysgol y Parc

Ysgol Maes Hyfryd

Ysgol Beuno Sant

Ysgol Bro Tegid

Daeth cyfanswm o 110 o blant draw i’r project fel rhan o Natur ein Bro.  Yn ystod eu hymweliad â Llyn Efyrnwy dysgodd y plant am bwysigrwydd mawnogydd i’r amgylchedd a chafwyd cipolwg ar sut mae’r project yn adfer y cynefin hwn.

Yna dychwelodd y plant i’w hysgolion i weithio gyda Bardd Plant Cenedlaethol Cymru, Twm Morys, i greu darn o farddoniaeth.  Yn ystod wythnos yr Eisteddfod Genedlaethol, perfformiodd y plant eu barddoniaeth arbennig yn y Babell Lên ar ddydd Sul cyntaf yr Eisteddfod.

Gwelwyd y plant ar adroddiadau S4C o’r Eisteddfod a chawsant eu crybwyll gan Gerallt Pennant ar Radio Cymru ac aelodau o staff yr RSPB a CCGC yn ystod yr wythnos.

Ar y stondin ar y Maes roedd gwybodaeth gyffredinol am y Project a ffotograffau; “mynydd” symudol yn cynnwys rhywogaethau’r orgors a fenthycwyd i’r Project gan Plantlife; sioe sleidiau o ddelweddau o’r Project; cerdd am fynyddoedd y Berwyn a ysgrifennwyd gan y bardd lleol Robin Hughes; a’r cerddi a ysgrifennwyd gan y plant fel rhan o Natur ein Bro.

Trefnodd y Project hefyd nifer o weithgareddau i blant drwy gydol yr wythnos yn cynnwys gwneud bathodynnau, lliwio, gwneud cylchoedd allweddau a chwileiriau.  Roedd y gweithgareddau yma’n hynod o boblogaidd ac ynghyd â thaflenni a chylchlythyrau’r project llwyddwyd i ddenu nifer fawr o bobl i’r stondin.

Bu’r wythnos yn hynod o lwyddiannus i’r project a buom yn siarad â llawer o bobl o ardal Y Bala, ffermwyr lleol a oedd â diddordeb yn y project ac unigolion o ardaloedd ledled Cymru a gweddill Ewrop.