Y Project yn Croesawu Swyddogion Llywodraeth Cynulliad Cymru

Ar 30 Medi daeth swyddogion LlCC o Dir Gofal a’r Adran dros Faterion Gwledig draw ar ymweliad â’r project LIFE Gorgors Fyw Cymru.  Cychwynnodd y diwrnod yng Ngwesty Llyn Efyrnwy gyda thri siaradwr.

Rhoddodd Mike Walker (Prif Warden Llyn Efyrnwy i’r RSPB) gyflwyniad ar y gwaith y mae’r RSPB wedi ei wneud ac yn parhau i’w wneud ar lan Llyn Efyrnwy, yn cynnwys y gwaith rheolaeth dros y gylfinir, rheolaeth y rhostir, a’r coedlannau.  Hefyd, siaradodd Mike am y gwahanol gyrff sy’n cymryd rhan ar lan Llyn Efyrnwy a’r angen i weithio mewn partneriaeth â hwy.

Gan Mike Morris (Rheolwr y Project LIFE) cafwyd hanes y gwaith y mae’r project wedi ei wneud ar lan Llyn Efyrnwy ac ar y Migneint.  Hyd yn hyn, mae’r project wedi llenwi 300 cilometr o ddraeniau ac wedi adfer 250 hectar o orgors a oedd wedi ei phlannu â choed.  Mae llawer o’r ysgolion cynradd lleol wedi ymweld â’r project ac eleni roedd gennym ran bwysig yn y rhaglen Natur ein Bro, a weithredwyd gan Gyngor Cefn Gwlad Cymru ar gyfer yr Eisteddfod Genedlaethol yn Y Bala.

Rhoddodd Debbie Caldwell (Cydlynydd Llwyfannau UKPopNet) grynodeb o beth yw UKPopNet, a’r amrywiol brojectau ymchwil sydd ar y gweill ar hyn o bryd ar lan Llyn Efyrnwy.  Mae eu gwaith yn canolbwyntio ar nwyon tŷ gwydr a sut mae cynefinoedd o fawnog yn gollwng ac yn cadw’r nwy.

Ar ôl cinio, aeth y grŵp i’r rhostir i edrych ar rywfaint o’r gwaith o gau ffosydd sydd wedi digwydd ac i drafod y peiriannau a’r technegau a ddefnyddid wrth wneud y gwaith.  Roedd y drafodaeth yn cynnwys sut mae’r project yn delio gyda thirfeddianwyr lleol a sut mae’n eu hannog i gymryd rhan yn y math yma o waith.

Daeth y diwrnod i ben gyda thrafodaeth am y dyfodol gyda’r Cynllun Amaeth-amgylcheddol hir-ddisgwyliedig Glastir ar y gorwel.  Cafwyd llawer o adborth positif gan y grŵp felly roedd yn amlwg yn dda o beth bod y glaw wedi cadw draw.